التهاب السحايا شو هو شو أنواعو أسبابه وعلاجه؟

التهاب السحايا هو عدوى نادرة بتصيب الأغشية اللي بتغطي الدماغ والحبل الشوكي وهي الأغشية هية يلي بتحمي الدماغ وبتغذيه وإله عدة أنواع:

_ التهاب السحايا الجرثومي بتسببه عدة أنواع من الجراثيم متل المكورات الرئوية والمكورات السحائية أو الليستيريا والمستدمية النزلية HIB وهاد النوع خطير كتير وممكن يكون مهدد للحياة أو ممكن يسبب تلف بالدماغ بس لحسن الحظ إنه في لقاح ضد هي الجراثيم بيعمل وقاية ضد الإصابة بالمرض

_ التهاب السحايا الفيروسي وهو شائع أكتر من الجرثومي بس أقل خطورة منه

_ التهاب السحايا الفطري مو شائع متل الفيروسي و الجرثومي وهو نادر ما بينصاب فيه غير الأشخاص اللي عندهم نقص مناعة متل مرضى الإيدز

_ التهاب السحايا الطفيلي نادر كمان وبصير بسبب طفيليات بتصيب الحيوانات بينعدى فيها الأشخاص وقت ياكلو الحيوانات المو مطبوخة منيح

_ التهاب السحايا الأميبي مرض نادر وممكن يكون قاتل بسببه وحيد خلية Naegleria fowleri بعيش بالتربة وبالمي الحلوة وبينصاب فيه الناس وقت السباحة

_ التهاب السحايا المزمن بيتطور على مدى اسبوعين وإله نفس أعراض وأسباب الفيروسي و الجرثومي

وبالنسبة للأعراض بيشعر المريض بالصداع الشديد والحرارة العالية والخدر بالوجه والحساسية للضوء وبتتيبس الرقبة، وكمان بحس المريض بالغثيان وبصير عنده إقياء وصعوبة بالتركيز ونعاس و قلة شهية، وعند الرضع منلاحظ انتفاخ المنطقة الطرية اللي براس الطفل

العلاج بكون حسب نوع التهاب السحايا المصاب فيه المريض

وفيكن توقوا أنفسكم من الإصابة بالمرض إذا غسلتوا ايديكم منيح قبل الأكل وبعد الخروج من الحمام وما تشاركوا حدا غراضه الشخصية أو المكياجات وخصوصي الحمرا و المعالق والصحون ولازم تغطوا تمكم وأنفكم وقت تسعلوا أو تعطسوا وتطبخوا الأكل بشكل كتير منيح حتى يستوي وطبعاً أهم شي اللقاح تعطوه لأطفالكم..