بتصرفي على شعرك كتير وقليل ومهما تهتمي بيه برضو بيتساقط وخفيف ومهما تروحي لدكاترة جلدية برضو مافيش فايدة فى علاج شعرك ومش عارفة السبب ايه ؟ 

خليني اقولك اجابة سؤالك وهو إن صحة جهازك الهضمي هي السبب في ضعف وتساقط شعرك 

الاجابة غريبة للوهلة الأولى بس منطقية جدًا وده لأن الجهاز الهضمي اكتر بكتير جدًا من مجرد جهاز بيتعامل مع الغذاء فقط 

  كلنا عارفين إن أى عملية بتحصل في الجسم هي عبارة عن تفاعلات كيميائية لتحقيق نتيجة معينة. وتعتبر الإنزيمات الهضمية من المحفزات على نمو الشعر بجانب تحسين الدورة الدموية في الجسم بوجه عام. 

  فالإنزيمات بتلعب دور مهم ورئيسي في وظائف الصيانة والإصلاح والبناء. وامتصاص العناصر الغذائية والمساعدة في اصلاح الأنسجة وضمان عمل الجهاز المناعي.

  ولما بنتكلم عن صحة الشعر، فإن الإنزيمات الهضمية بتزيل الشوائب من مجرى الدم وبتحسن تدفق الدم، وده معروف إنه مهم جدًا لدورة نمو الشعر. فبالتالى لو الدورة الدموية بطيئة أو فيها اضطراب، التغذية مش هتوصل للشعر بشكل سليم وبالتالى هيضعف ويتساقط.

إذا كنتِ مريضة قولون عصبي أو مريضة قولون تقرحي أو كرونز أو غيرهم من امراض الجهاز الهضمي  فغالبًا هتكوني بتعاني من مشكلة تساقط الشعر وضعفه. وده بسبب وجود خلل فى بيكتيريا الأمعاء الجيدة وبالتالي التأثير بشكل سلبي على دورها في تدعيم هرمونات نمو الشعر.

فالأمعاء بتساعد على امتصاص المغذيات مثل : البايوتين ، فيتامين ك ، فيتامين ب 12 ، النياسين ، حمض الفوليك ، والأحماض الامينية . وكلهم مهمين جدًا لبشرة وشعر اكثر صحة .

  وبجانب دور بيكتيريا الأمعاء في امتصاص العناصر المغذية الهامة أو تصنيعها فهى بتأثر كمان على توازن الهرمونات في الجسم زي هرمون الإستروجين والكورتيزول وهرمون التستوستيرون واللى ليهم ارتباط مباشر بنمو الشعر.

  ونقطة مهمة لازم نعرفها إن قوة جهازك المناعي بنسبة 70 % من قوة وصحة امعائك. وبالتالي لو لاحظتي أى انتفاخ أو غازات كتير أو خمول بجانب تساقط الشعر فغالبًا ده إشارة لوجود مشكلة في جهازك الهضمي ولازم تعرفيها.