أدوية التخسيس

 

مبدأيا  ، لا يفضل انك تاخدها طول ما انت سليم ومعندكش سبب مرضى انك تنزل وزن ف اسرع وقت، خلي جسمك ياخد وقته ف انه يتعود ع التغيير وينزل براحته عشان مترجعش وزن تاني.. 

 احنا بنديها ل مين او اتعملت ليه ؟!

 اتعملت للناس اللي ال BMI بتاعهم اكبر من 30 و بيبقى عندهم سبب مرضى زي السكر النوع التاني او الضغط او الكوليسترول عالي ومعرض للجلطات ف احنا وقتها بنبقي محتاجين اننا نقلل وزنهم ف اسرع وقت  مع تغيير برنامج الاكل بتاعهم، يعني وقتها بيبقي علاج تكميلي و مش اساسي..

[BMI = الوزن ÷ مربع الطول]

  الأدوية دي ف الاغلب بتشتغل ع ٣ حاجات :

 يا اما بتقلل الشهية وهنا ف الاغلب بتبقى شغالة ع مراكز الجوع والشبع ف الدماغ..

 يا اما بتقلل امتصاص بعض العناصر زي الدهون..

 يا اما بتزود حرق الدهون..

هتكلم النهاردة عن اكتر الأقراص المستخدمة ف مصر و علاج واخد موافقة ال FDA (منظمة الغذاء والدواء) وهو.. 

  الاورليستات.. 

 موجود ف أدوية كتييير ف السوق زي :

Orly - regimax - orlistate - xenical - orlistyle - orlismart - quick slim - slim safe. 

المادة دي بتمنع امتصاص الدهون عن طريق انها بتوقف انزيم معين انه يكسر الدهون ف بالتالي  الامعاء مش هتقدر تمتص الدهون دي لان حجمها كبيييير.. 

  لو بتاخد العلاج ده خلي بالك من كام نقطة : -

١) ان العلاج مش سحري، يعني لااازم معاه نظام غذائي ب دهون قليلة.

٢) الجرعة لا تتعدى ال ١٢٠ مجم ف اليوم

٣) بيقلل امتصاص الدهون بنسبة ٣٠ ٪ بس..

٤) خلي بالك لانه بيسبب ان الدهون تطلع ف البراز ف هتلاقي البراز مليان دهون و ممكن يعمل تقلصات ف البطن، و خلي بالك طول ما انت بتاخده لان الزيوت ممكن تنزل من غير ما تدخل الحمام، بتلاقيها اتسربت كدة وريحتها بتبقى مش لطيفة..

٥) لو استمريتو عليه فترة خلي بالك لانه ممكن يعمل نقص ف الفيتامينات الدايبة ف الدهون زي فيتامين K و E و D و A.. 

٦) بلاااااش تاخدوه ع طول وده لان في بعض الحالات النادرة المادة دي أثرت على الكبد وعملت (liver injury) ، هو مصرح بيه انك تستخدمه فترة طويلة بس الأثر الجانبي ده ممكن يظهر و تبقى من الحالات النادرة اللي ظهر عليها العرض ده ف بلاش