16:05
الميكروب السبحي .. وسرعة الترسيب .. تحليلين ولاد حلال ومفيدين .. بس مظلومين معانا ....😢😢
.....
الميكروب السبحي هو نوع من البكتريا المسئولة عن الكثير من حالات التهاب اللوزتين الصديدي ..
طب ايه اللي ظالمه معانا؟
تحليل الأجسام المضادة بتاعه اللي اسمه ASOT ... او اللي الناس بتسميه بالغلط نسبة الميكروب او نسبة الصديد....
.......
التحليل ده عبارة عن أجسام مضادة بيكونها الجسم ضد الميكروب .. أكرر تاني .. أجسام مضادة يعني مادة بيفرزها جسم الطفل لمقاومة الميكروب .. يعني مقاومة ومناعة ضد الميكروب السبحي .. يعني مش هي الميكروب نفسه ولا حاجة ..
....
النسبة الطبيعية في الأطفال لغاية 400 .. يعني أصلاً تحليل نسبته 200 مش ايجابي ولا حاجة ..😯
....
الأجسام المناعية دي تبتدي نسبتها ترتفع في الجسم بعد دخول الميكروب السبحي بمدة من أسبوع لأسبوعين وتوصل لأعلي مستوي لها بعد حوالي خمس أسابيع وتنخفض بعد ٦ شهور 😯😯😯.. أيوا بعد ٦ شهور ..🤔🤔🤔 عدم فهم التسلسل الزمني ده بيعمل مشاكل كبيرة جداً .. مثلاً لو الطفل جاله التهاب لوزتين والتحليل اتعمل بدري .. في خلال أول أسبوع مثلاً .. هيطلع سلبي أو مرتفع بنسبة بسيطة .. عشان لسه مارتفعش زي ماقلنا بيبتدي يرتفع بعد أسبوع لأسبوعين ويوصل لأقصي ارتفاع بعد خمس أو ست أسابيع ..
الطفل ياخد العلاج .. اللي لازم يكون كورس كامل وتحت اشراف الطبيب .. بعد أسبوعين ولا تلاتة يروح الأهل يكرروا التحليل وكلهم أمل ان النسبة تكون راحت يلاقوها زادت .. ييجي في ذهنهم ان العلاج كان غلط وده مش حقيقي ده المسار الطبيعي للأجسام المناعية اللي اسمها ASO انها تزيد في الفترة دي اللي هي أول خمس أو ست أسابيع بصرف النظر عن نجاح العلاج من عدمه ..
بصرف النظر دي معناها ان الطفل اتحسن والنسبة زادت؟ آه .. ممكن جداً ..
.....
مثال تاني اننا نعيد التحليل بعد شهر نلاقيه منزلش ونبتدي نلف وندور وندي الطفل بنسلين طويل المفعول وكل ده خطأ .. مش هتنزل النسبة قبل ٦ شهور ولو جه دور التهاب تاني في المدة دي هنبتدي نعد ال ٦ شهور من الأول.
....
المظلوم التاني معانا هو سرعة الترسيب 😭😭😭..
ده مؤشر أساساً لوجود التهابات ويرتفع بنسب متفاوتة مع أي التهاب .. يكون في الاسنان في الودان في أي مكان .. سرعة الترسيب العالية لوحدها بدون باقي العلامات لاتعني الاصابة بالحمي الروماتيزمية ..
.....
البنسلين طويل المفعول وقاية من نشاط الحمي الروماتيزمية للي جاله حمي روماتيزمية قبل كده ومش علاج للأطفال اللي عندهم ASOT عالي ولا سرعة ترسيب عالية .. فيه استعمالات تانية بس أقل انتشاراً ..
....
نبطل دكاترة ومرضي وأهالي أطفال نظلم ال ASOT وسرعة الترسيب ونخللي طويل المفعول في مكانه ومكانه فقط ..
منقول طبيب اطفال
Dr
13 February 2021
ع
14:15
علم التحاليل المخبرية
Comments
Post a Comment
اكتب تعليق حول الموضوع