اي علاقة الجاموسة بالشريحة🤔🤔

كان في برنامج ع سبيستون اسمه الرابط العجيب 😁

تعالى اقولك الرابط بينهم😎🤝

بس معانا مكالمة هاتفية مع صديقة جروب شرح التحاليل بالتفصيل✌️

🤷ألو ألو مساء الخير يافندم

🧕مساء الخير يا دكتر سليم

🤷ممكن اتعرف على حضرتك

🧕أنا بروسيلا☺️

🤷أهلا مدام بروسلي🤝

🧕لحظة بس بروسلي إيه 😡 اولا اسمي بروسيلااااا brucella ثانيا أنسة من فضلك😏

🤷معذرة أنسة بروسيلا انتي ايه بالظبط🤔

🧕أنا بكتريا وكدا، عارف صبغة الجرام gram stain

🤷اه عارفها

🧕انا بقا مش عايزاها😁

🤷اه يعني حضرتك gram negative bacteria، ع كدا تعرفي الانسة Escherichia coli ؟

🧕حبيبة قلبي الاي كولاي❤️❤️ احنا الاتنين مش بناخد صبغة الجرام

🤷ع فكرة اسمك جميل اوي ☺️❤️

🧕ما خلاص بقا احنا ع العام يا راجل☺️😘

🤷لا بجد مين سماكي بالاسم دا

🧕بابا David bruce🤭

🤷ألف رحمه ونور ع الوالد، طيب لما بتصيبي إنسان بتعملي ايه

🧕اي السؤال دا، بعملوا brucellosis ياراجل😏

🤷هو انا ليه حاسس اني بكلم رقاصة،😡 ما تتلمي يابروسيلا، مقصدش كدا، اقصد انتي دخلتي جسم الإنسان ازاي

🧕عارف لا مؤاخذة الجاموسة والمواشي 🐗🐂🐄🐖🐑🐏🐃🐫وكدا انا كنت ف حالي فيهم، يجي البني آدم منكم ويحتك بالجاموسة لامؤاخذة او يشرب لبن ليها مش مبستر او اي منتجات لبن زي الجبن وانا موجودة فيها، وهوب دبل كيك تلاقيني عملت له عدوى وممكن عن طريق الهوا او اي سوايل انا فيها

🤷طيب حضرتك لما بتدخلي جسمي هتعملي ايه

🧕ع طول بلاقي مناعتك تضطهدني كأني صهيونية ياخويا والاقي جسمك سخن، وهتلاقي عندك وجع في مفاصلك وعظمك، ومش هيبقى ليك شهية للاكل وممكن تترعش، مع صداع وكدا

🤷انتي شكلك ست ملعب ومش سهلة ومؤذية😏🤏

🧕اولا قولتلك انا آنسة😡، ثانيا اه انا مؤذية انا ممكن اعملك Endocarditis وتخيل بقا قلبك يبوط ومتعرفش تحب، وممكن اعملك arthritis واخلي مفاصلك تلتهب وتتيبس وألم شديد، ولا مؤاخذة احيانا ممكن اعملك orchitis والخصيتين يلتهبوا وكدا☺️😉 وممكن اموتك بحتة meningitis يجيبك ارض ارض

🤷خلاص يا انسة بروسيلا طيب اعمل اي عشان اتقي شرك😔

🧕بص انا ارتحت لك اوي انت والجروب دا،☺️😘 وبحب اقولكم بلاش ألبان او منتجاتها مش مبسترة، واطبخوا اللحمة كويسه وسووها صح، ولو فلاح او بتحتك بالمواشي ألبس جوانتي وانت بتحلب او بتولدهم

🤷تمام متشكرين ع اللقاء☺️❤️

🧕استنى انت مقولتش للناس اي علاقة الجاموسة بالشريحة😁😁

🤷هههههههههههه ماشي يا بوبو، الجاموسة لبنها فيه بروسيلا، المريض شرب اللبن اللي فيه البروسيلا، تعب، راح المعمل يعمل تحليل brucella، في اختبار brucella latex على الشريحة ، ونركز شوية اي علاقة الجاموسة بالبقرة اللي ف الصورة 😁

ودمتم بخير

د محمد سليم

Dr

30 December 2020

ع

17:28