التهاب السحايا ... التهاب السحايا هو ( التهاب الطبقات المحيطة بالدماغ ) .

 

 المرض هادا مرض خطير جدا يعتبر .. لو اتشخص بكري وتعالج بكري تمشي الامور تمام بس لو ماتشخصش حيسبب كارثة وتشنجات واعاقة ومرات حتى يتوفى الطفل ..

في منه التهاب سحايا فيروسي .. والتهاب سحايا بكتيري

  الاسباب .. باختصار ..

1 - التهاب مباشر من شخص عنده التهاب سحايا ..

2 - التهاب ثنائي .. يعني التهاب في الاذن مثلا ويمشي بعدين للدماغ ..

   اعراضه ..

1   حرارة ..

2   تلقى البيبي متضايق هلبا وينقنق ويعيط .. 

3   ( تيبس الطفل ) يعني لما تجي تقيم راسه من تالي مايقدرش يثني رقبته .. تلقاه يقيم جسمه كله معاك لان مايقدرش يقوس ظهره لانه الالتهاب واصل للنخاع الشوكي ..

4   مرات ترجيع ..

5   مرات تشنجات او غيبوبة في المراحل المتقدمة ..

  في حاجة لازم تعرفها في طب الاطفال.  

لما يجينا طفل يعاني من حرارة .. ومانعرفوش السبب ( يعني تدير كشف ومافيش الواز او التهاب اذن او احتقان او شي ) 

هكي معناها لازم نديرو مجموعة تحاليل باش نتاكدو من السبب ..

التحاليل ..

تحليل الدم العادي CBC ونركزو ع عدد الكريات البيضاء ( غالبا تكون مرتفعة في حالات السحايا ) ..

تحليل معدل الالتهاب CRP .. وهادا يقولك ف التهاب او لا ..بس مايقولكش وين مكانه ..

تحليل بول .. مرات اصلا الحرارة سببها التهاب مسالك

وصورة ع الصدر لو عنده كحة ودهشة ..

واخيرا .. عينة النخاع .. هادي ضرورية باش نعرفو انه الطفل ماعنداش سحايا ..

  عينة سحب النخاع ..

هادي اكبر كابوس للاهل ..بس هي ساهلة جدا وماتخوفش ..

- وهادي نخشو بحقنة في النخاع الشوكي تحت .. ونسحبو السائل النخاعي ونبعتوه للمعمل ونتاكدو انه مافيش التهاب سحايا ..

  الطفل اللي فوق العامين وفتحة اليافوخ ف الراس مسكرة لازم كشف ع عصب العين لانه لو في التهاب ف عصب العين وتسحب السائل .. هكي الدماغ حينزل (نتيجة الضغط داخل الجمجمة ) وينزل مع مجرى العمود الفقري ويتوقف التنفس ويموت الطفل  ..

  لو الطفل عنده سحايا حيقعد ف المستشفى وياخد علاجاته كاملة ف الوريد ..

  لو لقدر الله ماتشخصش الطفل وعاملوه كانه التهاب حلق مثلا .. حيزيد الالتهاب ومرات يسبب تجمع امية ع الدماغ و

يخش ف غيبوبة .. وغالبا حيتوفى ..

- لذلك لو طلبو عليك عينة النخاع وافق عليها بدون ماتشيط الريق ..

- في فيديو نزلته قبل لطفل ساحبله عينة نخاع .. مانبيش انزله خوفا ع مشاعر الملايين ..