الحالة: تحليل Rubella IgG عالى
و تحليل Rubella IgM طبيعى!
المعلومة: ده معناه عندك مناعة من الاصابة بالحصبة اثناء الحمل ومش معناه ابدا انك تنزلى الحمل علشان البيبى تشوه بالحصبة.
الحالة: اجهاض متكرر وتحاليل التجلط عندها مش طبيعية!
المعلومة: لازم تحاليل التجلط لما تتعمل ماتكونيش؛
- حامل، بعد ولادة، او بعد سقط.
- على ادوية سيولة او ادوية منع حمل.
- تعرضتى لجلطة فى اى مكان فى جسمك حديثة.
طيب استنى قد ايه علشان اقدر اعملها فى الحالات دى؟
توقفى ادوية السيولة ومانع الحمل على الاقل اسبوعين وتستنى بعد الحالات التانية على الاقل ٣ شهور.
واذا عملتها قبل كدة يحصل ايه؟
النتيجة غير دقيقة وتطلعك عندك مشكلة تجلط وانتى مش عندك وتاخدى ابر مسيلة طول الحمل مانتيش محتاجاها.
الحالة: اجهاض متكرر .....اصل عندها فيروس!!!
المعلومة: الفيروسات كلها ممكن تعمل اجهاض مرة واحدة لكن كل الدراسات والابحاث اكدت انها متقدرش تعمل اجهاض متكرر.
الحالة: حامل وعايزة تصوم!
المعلومة: جميع الابحاث اللى اتعملت على موضوع الصيام فى حامل( بصحة جيدةةةة) اكدت ان مفيش اى اثار سلبية على الحمل، يعنى لو حملك ماشى تمام من غير اى مشاكل صومى من غير قلق.
ماتنسيش برده تعيشى بصحة وسعادة.
No comments:
Post a Comment
اكتب تعليق حول الموضوع