كاين بزاف حوامل يسقسيو على التوكسوبلازموز و مش فاهمينو مليح ويعتقدو أنو أي احتكاك للحامل مع القطط رح ينقلها المرض وهاذي معلومة خاطئة. 

والحقيقة أنّو النساء لي معندهومش مناعة هن المعرضات للعدوى والخطر. والإحصائيات يقولو 10 من بين 1000 حامل يتعرضوا لعدوى طوكسو. علابيها كي تروحي للطبيبة تمدلك تديري تحاليل من بينهم تحليل الطوكسوبلازم باش تقدري تتأكدي من اكتسابك للمناعة ولالا.

* أولا واشنو هو طوكسوبلازم ؟

رح نحاول نشرحلكم باختصار وش هو و ان شاء الله نفيدكم :

التوكسوبلازموز toxoplasmose هو مرض تتسبب فيه طفيليات les parasites لي تكون موجودة في الحيوانات. خاصة القطط و الكلاب.

في العادة نمرضو بيه و حنا صغار لأنو أغلبنا مربيين قطط و هنا تكتسبي مناعة من المرض هذا كيما أي مرض آخر يعني في حالة ما إذا زدتي مرضتي بيه يكون الجسم تاعك محمي و يتعرف على المرض هذا و يهاجمو في وقت قصير و هذي نسميوها المناعة المكتسبة Toxoplasma IgG 

في حالة ما إذا مامرضتيش بيه ونتي صغيرة ماتكونش عندك مناعة يعني اذا مرضتي منا و جاي الجسم تاعك يطول بش يتعرف عليه و لازملو وقت باه يصنع الأجسام المضادة ليه و هنا رح يأثر على الجنين بزااااف إذا كنتي حامل

 لأنو ينتقل ليه عن طريقك و رح يسببلو تشوهات خطييييرة لا قدر الله و هذي الاصابة الحالية نسميوها Toxoplasma IgM

ضرك كي تروحي تديري التحاليل تاعو كي تكوني بالحمل و ديما يطلبو التحليل تاعو لأنو مهم بزاااف لمعرفة امكانية حدوث تشوهات للجنين 

هنا ديما في اللابو يمدولك 2 نتائج وحدة خاصة بالمناعة المكتسبة لي حكيتلك عليها من قبل يعني تاع مرضتي و نتي صغيرة لي هي igg

و لوخرة نتاع الاصابة الحالية في حالة ما اذا تقستي ضرك و راكي مريضة لي هي igM

في حالة المرأة الحامل من الأحسن ديما تكون عندك مناعة مكتسبة من قبل باه تتفاداي أي خطر على الجنين نتاعك هنا تلقاي igg + يعني موجبة

و في حالة أخرى تكون الحامل معندهاش مناعة مكتسبة من قبل للأسف تلقاي igg - يعني négative

هنا لاااااازمك تطبقي وسائل الحماية و تحاذري روحك بزاف:

-تغسلي يديك مليح في كل وقت خاصة قبل الأكل

- تغسلي الخضر تاعك و الفاكهة بالخل و الما مليييح قبل ماتاكليها

-تبعدي على القطوط و الكلاب و خاصة الوسخ تاعهم حشاكم 

-تتجنبي أكل المعلبات السردين و الطونة و الكاشير و غيرها لأنها مضرة بالجنين

-تتجنبي شرب حليب الماعز أو البقر الطازج غير المبستر وكافة مشتقاته مثل الجبن.

- تتجنبي مأكولات الشوارع لأنك ماعلابالكش اذا الماكلة نظيفة ولا لا طايبة مليح ولا لا.

- و أهم حاجة اللحم لازم يكون طايب مليييييييح مليح من الأحسن يكون طايب ف لاكوكوت.

و هنا طيلة فترة الحمل تبقاي تعاودي في التحليل هذا باه تتأكدي بلي ديما ماتقستيش و ديما لارام تبقى igm تاعك سالبة- 

هنا عادي مكانش خطر، أما في حالة إذا ماقدر الله و تقستي و نتي بالحمل و رجعتلك igm موجبة هنا لازم تروحي للطبيبة في أقرب وقت و تمدلك المضادات الحيوية حتى الولادة، باه تنقص من حدة التشوهات لي ممكن يتعرضلها الجنين، وتوجد بعد الحالات لي تولد بشكل طبيعي وتنجو من الخطر.وأخطر فترة على الجنين ما بين الأسبوع العاشر والرابع والعشرين من الحمل.

وطبعا الأم إذا عرفت جيدا كيفاش تحافظ على صحة تغذيتها وتحاذر روحها أثناء الحمل مارحش يكون مشكل كبير بإذن الله. و درهم وقاية ديما خير من قنطار العلاج وطبعا راحة ليك ولوليدك لي جاي بإذن الله.

إن شاء الله تكونو استفدتو و فضلا ديرو مشاركة للمنشور بش يستفادو كامل لحوامل ونتلاقو في منشور قادم بحول اللّه.