مفيش حاجه اسمها تحليل حساسية طعام Food panel ولا وخز skin prick نشخص بيه سبب الارتجاع والمغص والوجع اللى فى بطنك أو الإسهال أو الإمساك فى الميزان العلمى السليم .
مفيش حاجه اسمها تحليل حساسية طعام Food panel ولا وخز skin prick نشخص بيه سبب التوحد والأكل اللى بيعمل فرط حركه وهيبره وتأخر عقلى أو لغوى والرابط بين الأكل والحاجات دى -لسه لم يثبت
فى الميزان العلمى السليم.
مفيش حاجه اسمها تحليل بصمة غذائية IgG فى الميزان العلمى السليم .
مفيش حاجه اسمها كانديدا و leaky gut أو تسريب أمعاء أقعد أعمل تحاليل ليهم و أجيب أكل يقلل نموهم وأمنع أكل على أساس وجودهم فى الميزان العلمى السليم .
مفيش حاجه اسمها طفل يجيله مغص واعمل له تحليل الدم المخفى فى البراز يطلع إيجابى يتشخص حساسية لبن بخ خلاص كده امال انتا فاكر ايه ؟ - الدم المخفى لا هوا خاص بالحساسية أصلاً ولا دليل على أى مرض بعينه وخطؤه الإيجابى كتير جداً والحساسية ليها معايير تشخيص واضحه وصريحه ومبقاش الموضوع "مبهم" زى زمان .
مفيش حاجه اسمها وجع بطن هوب اعمل تحليل جرثومة معده هوب دابل كيك يطلع إيجابى فأفنى عمرى فى محاربة وهم = الجرثومه موجوده ك بكتيريا متوطنه منتفع سلميه commensal فوق ٨٠-٩٠٪ ومبتتعالجش غير لو " هيا سبب الأعراض" برضه ليها معايير لقبول تحليل البراز بتاعها وتشخيصها الرئيسي بالمنظار ومبتنطلبش روتين فى أى وجع بطن - كل ده مش موجود فى الميزان العلمى السليم .
اه وبالمناسبه ، مفيش حاجه اسمها أصل انا عملت التحليل ده ف أمريكا بآلافات مؤلفه فهيكون أدق ،
ولا أمريكا نفسها فيها منتفعين ونصابين و دجالين عادى جداً بالعكس كله بالورقه والقلم طالما مستّف ورقه والمريض موافق وانا شفت ده بعينى أماكن رحتها هناك ، ويكاد يكون مفيش ممارسه طبيه سليمه زى بروتوكولاتهم نفسها ما بتقول إلا فى المستشفيات الجامعيه والمؤسسات الرسميه - المراكز الخاصه انتا وحظك .
ومفيش حاجه اسمها تقولى طب وانا اعمل ايه انا صوتى اتنبح فى الصفحه دى وانا عمال انزل فى فيديوهات ومقالات أوعى فيها زمايلى الأطباء والناس عن خطورة التشخيص الزائد للحساسيات وعن اختلاف بروتوكولى نفسه خلال السنين اللى فاتت - مش صح الدكتور يكون جامد وثابت على حاجه طالما اتعلم الأحدث والأدق ومش عيب يقول اتعلم هنعيش طول حياتنا بنتعلم العيب عاللى مبيطورش من نفسه لإنه هيكلف نفسه وعيانه كتير أوى .
Comments
Post a Comment
اكتب تعليق حول الموضوع