شهيرة شابة لطيفة، بس طووووول عمرها نحيفة
نفسها وزنها يزيد شوية، بس عملت محاولات كتير من غير نتيجة.
قررت تروح لاخصائي تغذية عشان يساعدها شوية.
تعالوا نشوف شهيرة عملت ايه؟؟
الدكتور كتب لها نظام غذائي تمشي عليه، بس هيا كانت عايزة تزيد في الوزن أكتر .. فاستخدمت مع النظام دواء سمعت عنه، و بالفعل أخدت شهيرة دواء لزيادة وزنها و مشيت علي النظام الغذائي معاه، وفي اسبوع واحد زادت خمسة كيلو بحالهم ، و كانت فرحانة جدا
في يوم شهيرة قعدت تتكلم مع صاحبتها مريم. مريم صيدلانية شاطرة و بتعرف تدور و تبحث صح عن أي معلومة دوائية من مصادر موثوقة و مبينة علي الأدلة و مش بتعدي اي حاجة من غير ما تدقق فيها .
شهيرة حكت لها و هي مبسوطة و طلعت علبة الدواء من شنطتها توريها لمريم .
مريم لما شافتها استغربت جدا، و دار بينهم الحوار التالي:
مريم: الدواء ده مش موجود في الصيدلية، انتي جبتيه منين ؟؟
استغربت شهيرة و قالت لها عادي أدوية السمنة و النحافة موجودة و متوفرة في كل حتة وبعدين يا مريم دي شوية اعشاب، ايه المشكلة يعني؟
مريم علي طول دخلت علي الانترنت و قعدت تدور علي الدواء، و اكتشفت ان الدواء ده مكتوب عليه انه اعشاب لكن في الحقيقة هو فيه حاجة مضادة للهستامين و كمان فيه كورتيزون بنسب مش معروفة
مش بس كده، الدواء ده فيه حاجة اسمها asarone و دي مادة مسرطنة و ممنوع استعمالها نهائياً، و في دول كتير مانعة دخول الدواء ده و بتجرم دخوله و استعماله، و كمان منظمة الغذاء والدواء الأمريكية منزلة تحذير من استعماله نهائيا
شهيرة: يعني ايه يا مريم؟؟؟ انا مش فاهمة حاجة خالص .
مريم: يعني الدواء ده لازم توقفيه لأن الكورتيزون اللي فيه بيزود الوزن نتيجة احتباس السوائل في الجسم لكن بيؤدي لآثار جانبية و بيضعف جهاز المناعة، و ما ينفعش ابدا نستعمله عشان نزود وزننا
عايزة اقول لك حاجة مهمة جداً يا شهيرة، الصيدلية فقط هي مكان بيع الادوية المصرح بيه. و أشارت اليها بحزم و قالت "إوعي يا شهيرة تجيبي دواء من جهة غير معروفة ولازم تروحي لدكتور متخصص تتابعي معاه".
و استكملت مريم حوارها و قالت "أهم حاجة يا شهيرة عشان تزودي وزنك. هي إتباع نمط الحياة الصحي و الغذاء السليم و الرياضة المتوازنة عشان تضمني زيادة وزن سليمة و صحة قوية
دي حدوتة شهيرة، علي فكرة القصة_حقيقية، و هتلاقوا صورة الدواء و رابط التحذير الخاص بال FDA.
و اوعوا تاخدوا ادوية مجهولة المصدر
و لو في أي دواء مش عارفينه ممكن ترجعوا للصيدلي أو الطبيب عشان تعرفوا كل المعلومات اللازمة
Comments
Post a Comment
اكتب تعليق حول الموضوع