لو مريض سكر او حد يهمك مريض سكر استحمل واقرا

 هاتكلم عن موضوع حيوى ومهم والبوست طويل بس مهم.

.. لو مريض سكر او حد يهمك مريض سكر استحمل واقرا البوست حتي لو تقسمه علي اكتر من مرة حاولت اجمع فيه معظم النصايح المهمة. 

... طبعا الوضع مش مضمون حاليا فعاوز اكتبه قبل رمضان عشان لو ربنا اراد بشئ يفضل علم ينتفع به في حياتي ومماتي واسال الله التوفيق والاخلاص في النية.

... رجاء ليا ماتنسونيش من دعواتكم الجميلة بظهر الغيب. 

انا هاتكلم عن السكر فى رمضان وهاتكلم عن النوعين النوع الاول والتانى.

..بس هانحاز للنوع الاول اللى بيحصل اكتر فى الاطفال وماعلهوش تركيز اكبر زى النوع الثانى اللى بيحصل اكتر فى الكبار ونسبته تزيد عن 90 فى المية من مرضى السكر بمصر.

...مرض السكر بقى ازمة حقيقية بتهدد مصر.

..كفاية بس ان اقولكم ان حوالى 9 مليون مصرى مصابين بيه غير الناس اللى مش متشخصة كمان وحوالي 5 مليون في مرحلة ماقبل السكر prediabetes.

..وان مصر للاسف التاسع  على العالم فى عدد مرضى السكر ومرشحة السنين الجاية تبقي السابع للاسف.وقد ايه المرض دا بيدمر حياة اسر كتيرة وخصوصا افة القدم السكرى.

..والمتهم الرئيسى عدم وعي  المريض وللاسف لا نعفى نفسنا من المسئولية عدم وعى الطبيب المعالج اللى بيتعامل مع المرض دا باعتباره شئ عادى او دوا او انسولين هيديه وخلاص يظبط السكر والعيان ينزل من على دماغه ويشوف غيره وبرضه الظروف الاقتصادية السيئة اللى بتخلينا عاجزين عن استخدام الادوية الحديثة وتطبيق التوصيات العالمية انا شفت انه من واجبى كشخص بحاول ادرس فى المجال دى احاول افكر نفسى وزمايلى بمعلومات تهمنا وتنفع المرضى بازن الله..

..هو صحيح دا هيبقى فى نطاق صفحتى الصغيرة ومابين زمايلى من شباب الاطباء بس اهى خطوة للامام هدفها مساعدة الناس.

...انا هاحاول اتكلم عن النوع الاول اكتر اللى هو للاسف نسبته بقت كبيرة جدااا حاليا واعتقد اننا لو عندنا احصاء كويس كنا هنحتل مركز كبير للاسف بين الدول الاكثر اصابة بيه .

....اللى شجعنى اتكلم اننا فى شهر فضيل شعبان متبوعا بعيد الامة رمضان اعاده الله علينا باليمن والخير والبركات ودايما بيكثر السوال انا عندى سكر اصوم ولا لا.

...فى دراسة اتعملت فى 2001 اسمها EPIDIAR ودى اختصار لكلمة Epidemiology of Diabetes and Ramadan واتعملت فى 13 دولة من اكبر الدول الاسلامية على 12.914 مريض سكر وخلصوا منها بتوصيات لمريض السكر من اجل الصيام.

..بس سنة 2017 ال international diabetes federation بالتعاون مع Diabetesand ramdan international alliance عملوا تحديث وتبسيط للتقسيمة دى ودى اللى هاتكلم عنها وادوها درجات :

..احمر يعنى ممنوع واصفر قابل للتفاوض واخضر امان.

الاحمر اللى ممنوع فيه الصيام بيضم :

1- عيان النوع الاول اللى على انسولين وسكره مش مظبوط سواء بتحاليل القياس العادية او بالسكر التراكمى يعنى بنتكلم عن حد دايما سكره عالى اعلى من 300 او قليل اقل من 7 وسكره التراكمى ملخبط معدى 9 فى المية .

2-عيان النوع الثانى اللى ملخبط برضه بنفس مواصفات النوع الاول فى السكر والسكر التراكمى فى اخر 3 شهور.

 3- عيان جاتله غيبوبة كيتونة استلزمت حجزه بالمستشفى .

4-عيان عنده مضاعفات سكر يعنى اعتلال فى الشبكية من النوع المتقدم او اعتلال فى وظائف الكلى او عيان على غسيل كلوى فعلا. 

5- عيان كان عنده مشكلة مرضية قبل بداية رمضان مباشرة استلزمت حجزه بالمستشفى .

6- الحوامل المصابين بالنوع الاول او لسه والدة وكان عندها سكر حمل.

 7- عيان كبير فى السن وعنده عدة امراض مزمنة يعنى مريض سكر وضغط وقلب مثلا.

اللون الاصفر بقى اللى فيه احتمالية نجرب الصيام فيه بمحازير معينة ودا بيشمل :

1-مريض النوع التانى اللى سكره فى اخر3 شهور بيتراوح بين 150 و300 وسكره التراكمى من 7.5 الى 9 بالمية بس مع عدم وجود كيتون او حموضة بالدم.

2-مريض النوع الاول الملتزم اللى سكره مظبوط دايما 

3-مريض النوع التانى اللى على انسولين .

4- الست الحامل المصابة بالنوع الثانى او جالها سكر فى الحمل بس سكرها مظبوط بالادوية ومش على انسولين يعنى على جلوكوفاج مثلا فقط

 5- عيانين اعتلال الكلى والشبكية بس حالتهم مستقرة ومافيش اى تغيير فيها من فترة.

 6- مريض سكر بيمارس عمل شاق زى شيال او عامل فى مكان محتاج مجهود كبير.

 7- المريض اللى ماشى على ادوية متعددة وخصوصا ادوية الاعصاب اللى بتقلل ادراكه الحسى بمعنى انه بيبقى مش عارف يتصرف مع الطوارئ اللى ممكن تحصله.

اما اللون الاخضر بقى وهو لون الامان يعنى يصوم ان شاء الله متطمن:

1-الناس اللى ماشية على نظام غذائى فقط وتنظيم حركة..

2- الناس اللى ماشية على ادوية بالبق صعب حدوث هبوط معاها زى metformin ..DDp4..acarbose ..SGlT2 inhibitors.

3- المرضى اللى سكرهم التراكمى من 6.5 الى 7 بالمية.

طيب اثناء الصيام هنعمل ايه...طيب الاول نعرف ايه مشاكلنا اللى ممكن تواجهنا عشان نتجنبها ..لقوا 4 مشاكل ممكن تواجه المريض :

1- ارتفاع السكر.

2- هبوط السكر.

3- تكوين اسيتون وحدوث حموضة وغيبوبة.

4- جفاف وحدوث تجلطات وخصوصا فى اوردة الشبكية .

عشان كدا طالما هاصوم لازم احافظ واعرف هاقيس سكرى امتى وامتى اكسر صيامى:

1- هاقيس اول ما اصحى من النوم ولو لقيت السكر اقل من 70 او اكتر من 300 لازم وحتما افطر.

2- لو سكرى قل عن 60 فى اى وقت تانى من النهار لازم افطر حتى لو قبل المغرب بخمس دقايق لان الهبوط قاتل وافضل موعد للقياس بعد العصر وقبل المغرب بنص ساعة وبعد الافطار بساعتين للناس اللى بتاخد انسولين عشان تظبط جرعته.

3- العادة بتاعة النوم بعد العصر او لعب الكورة بعد العصر ممنوعة منعا باتا فى مريض السكر فى رمضان لان مخزون الجسم بيبقى اوشك على النفاذ وفرص الهبوط بتزيد جداا وانا شفت كوراث بسبب نوم بعد العصر فى مريض السكر فى رمضان.

4- بعد الافطار لحد السخور هنشرب سوايل كتير جداا واقصد هنا المياه او عصائر فريش محلاة بسكر دايت او دون سكر..

5- تقسيم الوجبات وجبة الافطار من 50 الى 60 بالمئة والسحور من 30 الى 40 ووجبة خفيفة بعد التراويح من 10 الى 20 بالماء.

6- هنبعد عن الحلويات والاكل الدسم وهنركز فى السلطة والخضار والفاكهة.

7- نقلل السمنة ونبدلها بالزيت وخصوصا زيت الزيتون على الفول فى السحور.

8- هنحاول ناخر السحور ولابد من احتوائه على كربوهيدرات معقدة حتى تاخد وقت فى امتصاصها زى الفول والزبادي واللبن خالي الدسم كدا وقبل الفجر مباشرة هنحاول ناخد حاجة زى لبن بالبلح المجفف اللى امتصاصه هياخد وقت وهيزود المخزون عندنا ويجنبنا الهبوط..

9- ممارسة الرياضة هتتمثل فى صلاة التراويح او التمشية نص ساعة بعد الافطار. 

النقطة المهمة جرعات الادوية ايه وازاى نظبطها:

1-العيان اللى ماشى على ميتفورمين زى جلوكوفاج او سيدوفاج هياخد ثلثى الجرعة فى الافطار وثلث الجرعة فى السحور يعنى لو بياخد 500 مجم 3 مرات هياخد 1000 مجم فى الفطار و 500 مجم بالسحور.

2-العيان اللى ماشى على اماريل او دياميكرون ام ار ودول بينتموا ل sulphonyl urea هياخد نفس جرعته قبل الافطار.

3.العيان اللى ماشى مثلا على دواء مرتين فيه sulphonyl urea زى الجلوكوفانس والجليبوفين وغيرهم بنخاف جدا عليه من الصيام لان دول مفعولهم ممكن يمتد لاكثر من 24 ساعة بس لو هيصوم ومش عارف يغير علاجه لنوع اقل سببا للهبوط هندى الجرعة كاملة فى الافطار ونص الجرعة سحور.

4- العيان اللى ماشى على   DDP-4 inhibitors ودى مجموعة ممتازة للصيام بس غالية هيمشى على نفس جرعته انا هنا بتكلم على ادوية زى JANUVIA او GALVUS او ONGOLYZAاو TRAJENTA وinhiglip الجديد  والبدايل المصرى زى فيلداجلوز وجليبتس وايكاندرا وغيرهم هياخد نفس جرعته فى معادها لانها بتغطى 24 ساعة.

5- العيان اللى ماشى على ACARBOSE اللى هو ALPHA GLUCOSIDASE INHIBITOR او TZDS زى ال GLUSTIN او ال ACTOS نفس الجرعة..

6.العيان اللى ماشى على SGLT2 inhibitors نفس الجرعة مع الافطار زى ال forxiga الفورسيجا وال jardiance الجارديانس.

7.حقن ال GLP1 agonist زى ال Victoza وال Byetta وال Trulicity نفس الجرعة ونبعد عن الدهون لتجنب غممان النفس معاهم والقئ.

5- عيان الانسولين فيه شقين :

1.عيان النوع التانى اللى ماشى على ميكستارد اللى بيتاخد مرتين هياخد نفس جرعة الصبح فى الافطار ونص جرعة بالليل فى السحور يعنى لو فى الايام العادية بياخد 40 الصبح و20 بالليل هياخد 40 فى افطار رمضان و10 قبل السحور والافضل انه يستبدله بالانواع الجديدة زى ال NOVOMIX OR HUMALOG MIX وممكن هنا نعمل حاجة جميلة بمساعدة الدكتور نجيب قلم 50/50 نستخدمه افطار يشتغل على الوجبة الكبيرة وقلم 70/30 او 75/25 نستخدمه سحور مفعول السحر فى رمضان عن تجربة مع مرضى بجد.

2. عيان النوع الاول بتاعنا لو هنصومه لازم نفهم المريض واهله كويس الاطفال ممنوع تاخد ميكستارد لازم تاخد نوعين مائى ومعكر او مائى ولانتوس ودا كلام مهم جدا ياشباب لان ميكستارد فى النوع الاول وفى طفل كارثة والعيان ذنبه فى رقبتك.

..الجرعات تعدبلها هنلغى جرعة مائى الصبح وهندى جرعة المائى بتاعة الغداء فى افطار رمضان مع جرعة معكر الصبح وجرعة مائى العشاء هنديها قبل السحور اما معكر بالليل هيتاخد بنص جرعته الساعة 7 صباحا مثال منعا للخبطة 

طفل جالى وسكره مظبوط وعاوز يصوم ومش مقتنع انه مابيصمش وكان بياخد 10 مائى الصبح مع 10 معكر و12 مائى فى الغدا و8 مائى فى العشا و10 معكر قبل النوم 

تظبيطة رمضان هتبقى بازن الله:

نلغى جرعة الصبح وهياخد 12 مائى مع 10 معكر فى الافطار وهياخد 8 مائى قبل السحور وهياخد 5 معكر الساعة 7 صباحا نص جرعة المعكر الليلية المعتادة.

تنويه بسيط الافضل نستخدم RAPID ACTING ANALOGUE بديلة للمائى لتقليل احتمال الهبوط بس مشكلتها سعرها اغلي ولكن متاحة في التامين وهم NOVORAPID..HUMALOG..APIDRA.. وكمان نستخدم اللانتوس 

طويل المفعول كبديل للمعكر...وتظبيطة جرعته فى رمضان بنقلل جرعته 30 بالمية يعنى لو طفل بياخد 10 لانتوس فى العادى ياخد 7 فى رمضان ونفس الكلام ينطبق على الادوية الجديدة زى ترسيبا وتوجيو بنقلل 30 بالمية من الجرعة وطبعا هيبقوا لهم افضلية فى تقليل الهبوط....

-موضوع صعب وطويل بس مهم وكل عام وانتم بخير.