قصة سيلا من بلد النصارى 17

أنا أبدا ما بحتقر المسيحيين و لا دة تقليل منهم ، و لا اتربينا في اسرة بتحتقر الأديان لأنه ربنا قال ( وَلَا تَسُبُّوا الَّذِينَ يَدْعُونَ مِنْ دُونِ اللَّهِ فَيَسُبُّوا اللَّهَ عَدْوًا بِغَيْرِ عِلْمٍ)  معنى الآية واضح بالنسبة ليك ولا اشرحوا ؟ 

قلت ليهو واضح بفهم عربي ماتشرح لي ، قال لي لي سببين حأطلب منك تبعدي ، الأول لأننا مختلفين اختلافات جذرية ماعندها حل ، و اني ما ممكن في يوم أتزوج نصرانية و ما اعتقد انك حابه تعيدي تجربة أمك وأبوك تاني ! قلت ليهو وانا غضبانه وماسكة الغضب جواي ، و السبب التاني؟ 

قال لي إني بحب نونا و دايرها هي على سنة الله ورسوله وما بحب زعلها و مابرضى إني اشوفها زعلانة و لا انها تحس بالإهانة ، امبارح نونا اول مرة تطلع الدبلة من يدها و انا عارفها كويس لو ما حست بالضيق و وصلت الحد ماكانت عملت كدة ، والسبب انتي و انا كنت قايلها بتتوهم لكن عشان اقطع الشك باليقين كان لازم اجي و اواجهك وأسألك بوضوح ، والحمد لله انه دة الحصل عشان الامور ما تكبر اكتر من كدة ، انا ما كنت حاسي بي اي شيء يدل على انك بتحبيني والا كنت وقفتك عند حدك عشان ما تتوجعي ، عارف يعني شنو تحب زول من طرف واحد لأني جربتا الحاجة دي قبل كدة و لاني برضو شايفك زي اختي الصغيرة وماداير ليك الأذى ، الأحسن انك تبعدي و تنسي المشاعر دي يا سيلا ، احسن لي و ليك قبليني .. 

ماقدرت انزل ولااا دمعه وانا بسمع فيهو كنت متمالكة نفسي عشان ما ابكي قدامه ويشوفني ضعيفه ، يادوب حسيت بالجملة القالها لي اول زول في المطار ( ياخسارة مسيحية ) يادوب عرفتا يعني شنو ياخسارة ، كان نفسي اقول لي محمد ياخسارة انت مسلم كمان ، لكن الكلام كلو وقف جوة نفسي و نفسي اتسدت من النطق ولو بحرف ، اول زول احبه في حياتي رفضني ! احساس الرفض الحار دة عمري ماحنساهو لمحمد ، اذا الرجال مابتحمله الرفض فكيف بت رقيقه زيي ماقال هو ، تترفض ! الأصعب من الحب من طرف واحد انه الزول القدامك يرفضك ويسد الباب في وشك للأبد و إنت يادوب مشاعرك برعمت و ازهرت ، انتهى محمد من الكان داير يقوله ومشى حتى قبل مايشرب قهوة فاطمة الجابتها ليهو، مشى بعد مافهمني انه نونا بتسوى كل البنات عنده و انه ماعندو مانع يقطع اي علاقة هي ما دايراها في حياته وان نونا هي الأولوية ، شعوري وانا شايفاهو وهو ماشي كان زي الزول البدهس في قلبي و بمشي ، كنت حاسة بطعنه في صدري ، و قلبي اتقبض و روحي ضلمت و عيوني تقلت من الدموع وابت تنزل ، فاطمة قعدت جنبي تسألني في شنو ؟ الحصل شنو ؟ وانا كان لساني تقيل ماقادر يترفع ويحكي ليها الحصل .. قالت لي سيلا و مارديت عليها ، سرحتا بعيد افكر العيب في اني نصرانية شنو ؟ ليه محمد ما ممكن يتقبلني زي ما ابوي اتقبل امي ؟ كانت بتهز فيني فاطمة وهي بتسالني يابت مالك متحجرة كدة؟ قال ليك شنو محمد لمن زعلتي كدة؟ 

عاينت ليها وسكتا ، حست بي عايزة ابكي بعد رفة جفن واحدة ، مسكتني عليها وضمتني ، وانا هنا انفجرتا بكا و خنيق و دموع ، وانا بقول ليها قال لي انه مابحبني وانه مستحيل يحبني عشان انا مسيحية ، قال لي اننا مابنتشابه ولا حنتفق في يوم ، وانه نونا هي الدنيا كلها ، بقت تقول لي انا حذرتك لكن انتي ماسمعتي كلامي ، خلاص اهدي عليك الله ماتبكي ، قلت ليها نونا عشانها ممكن يسيب الناس كلها ، قالت لي سيلا خلاص دة غلطك من البداية كلمتك ماتتعلقي بيهو ، محمد خاطب مما عرفتيهو و هو بحبها من زمااان ياسيلا .. 

قلت ليها عايزة ارجع الخرطوم ، قالت لي حنرجع ماحاخليك براك قلت ليها لا عايزة ارجع براي ، قالت لي حنرجع بكرة في اول بص وعد ! قلت ليها اول بص متين؟ قالت لي الساعه تمنية صباح ، قمتا من السرير ومشيت دخلت جوة الملم هدومي وحاجاتي طوالي ، فاطمة دخلت لي امها تقنع فيها اننا حنسافر لانه ظهر لينا التسجيل للسمستر الجديد ومفروض نستعجل ، قدرت تقنعها اننا حنسافر بكرة بسرعه و اقنعتها وانا هنا كنت جهزتا الشنطة حقتي و قمنا الصباح للخرطوم بدري .. وصلنا البيت و فاطمة نزلت في داخليتها ، انا وصلت الشقه و لاقيت نور .. 

كانت متوقعه اني اجي مبسوطة و فرحانه من التغيير لكن حصل العكس ، استغربت من اني جيت زهجانه وقرفانة من اي شيء ف بدت تسأل وتستفسر عن حالي وعن العرس كان كيف و حكيت ليها بالليل الحصل لي مع محمد هناك ، وكان ردها نفس رد فاطمة انه محمد ما بشبه ابوي و ماضروري انه يكون سيء ، الاتنين كانوا شايفين تصرف محمد صح وانه زول عاقل الا انا الوقت داك شايفه محمد زول رفض حبي ليهو لاني مسيحيه .. 

دة كان سببه والا لو كنت مسلمة كان حيحبني ، حاولتا ابرر لي نفسي بالطريقه دي لكن لقيت انه محمد كان عندو عذرين ويمكن سبب غضبي عذره التاني انه اساسا مابحبني ، يمكن عقل الولد بيستوعب الرفض اكتر من عقل البت ، البت بتجيب اسباب وتمحورها وتقنع نفسها انها ما اترفضت عشان الزول مابحبها اترفضت عشان الظروف ما مساعدة ، يمكن عقل البت بعمل كدة لانه قلبها ماممكن يتحمل انه اترفض .. 

...

عدى السمستر التاني و انتهت السنة الأولى ، كنت خلاص بجهز لسفري لإيرلندا و لي ورقي ، بعد ما طلعت النتيجة و اتميزتا في الدفعه ، ودعت صحباتي ووصلوني لمطار الخرطوم و اتمنوا لي اجازة سعيدة بعد كسرة القلب الكنتا عايشة فيها طول السمستر ، بعد محمد ساعدني شوية على نسيانه و اني ما اتذكر تفاصيله الكنت بحبها ، مشيت ايرلندا وانا عايزة انسى محمد للأبد واشيله من قلبي اذا بقدر اشيله ، لاقيت امي وسلمت علي بشوق وحب بعد طول غيااب ودي كانت اول مرة اطول فيها سنة وما نتلاقى انا وهي ، رجعتا لروتيني الهناك ولحياتي الرياضية و الكنيسة و التراتيل ، وكنت بقعد مع الراهبات اطول فترة ممكنة في الكنيسة الإنجيلية و بضوي الشموع وقت التراتيل ، حضرت عزاء القسيس اندريا و طلعت من العزاء اتمشى على الشارع فلاقيت بت مسلمة محجبة وظاهر انها تركية ما عربية ، قعدت جنبها وابتسمت ليها وسألتها من وين ؟ قالت لي من سوريا ، قلت ليها بس ملامحك بتوحي انك تركية قامت ضحكت وقالت لي وانتي ملامحك ما بتوحي انك عربية ! قلت ليها سودانية ، اتخلعت وتاني سألتني عن جد ؟؟ قلت ليها ايوة بس مخلوطة بي اصول ايرلندية ، قامت قالت لي عشان كدة ، بدينا نتونس و دة فرق الناس هناك ، مابستغربوا في ديانتك ولا بسألوك انت كيف سوداني ومسيحي وبشرتك فاتحه ؟ الأسئلة الزهجت منها في السودان ، قالت لي زرتي السودان كم مرة؟ قلت ليها انا بدرس هناك ، قالت لي السودان حلو؟ انا عندي اهل هناك قلت ليها حلو شديد و اجمل مما يحكوا ليك عنه انه تشوفيهو بعينك وتحكمي ، قالت لي انتي لطيفه شكلك ، اسمها عبير و حجابها كان جميل جدا ، سألتها انتي هسي مابتسخني؟ لانه الجو كان عندنا حار ، قالت لي مابسخن و اشرت على راسها اذا قصدك الطرحتين ديل فهم مابسخنوا بي ابدا ، بالعكس يمكن بكونوا برد على راسي ، قلت ليها في السودان مافي محجبات كدة ، بلبسوا طرحة واحدة او توب لكن نادرا ما اشوف حجاب بطريقتك دي ، قالت لي اي بلد بتتميز بي حجابها المهم اننا كلنا مسلمين .. 

ابتسمتا ليها وسكتا ، قالت لي عن اذنك انا بعد دة حامشي لصلاة الظهر قربت ، عارفة المساجد في الدول الأوربية اصواتها ما بتتسمع قلت ليها ولا يهمك امشي على راحتك ، كانت بتقرا في كتاب كبير ، قلت ليها كتابك ماتنسيهوو، قالت لي ( دين محمد ) قلت ليها قلتي شنو عفوا ؟ قالت لي الكتاب اسمه دين محمد ، لمن قالت لي اسمه حسيت كأنها بتتكلم عن محمد الحبيتو ، كان نفسي اعرف دين محمد البخلي محمد يتمسك بيهو و مايرضى انه يدخل في شبهات او متباينات .. قلت ليها ليه اسمه دين محمد ؟ قالت لي بيتكلم عن النبي محمد وعن معاملاته ، قلت ليها احاديث يعني؟ قالت لي لا سيرة حياته الذاتية ، قلت ليها اهاا ..شافتني بسأل بحيرة فقامت مدت لي الكتاب قالت لي تشيليهو؟ انا مخلصاهو على فكرة ممكن اسلفك ليهو اذا مهتمة بالقراية ؟ واديك رقمي لمن تخلصي منه وصلي لي؟ قلت ليها لالا ماعايزاهو وهزيت براسي مستغربة منها ، اشيله ليه وهو بتكلم عن نبيهم ؟ قالت لي الكتاب دة ممتع جدا ومفيد ممكن يقراهو المسلم والما مسلم برضو ماتنحرجي بعرف انك مسيحية من الصليب الفي رقبتك ، لكن الكتاب عموما هو حلو لأنه ممكن تتعرفي على حياة محمد كإنسان وما كا نبي ، هنا حسيت اني فعلا عايزة اعرف عن حياة محمد الانسان فشلت الكتاب منها وقلت ليها شكرا .. .استأذنتني وجرت تصلي، انا شلتا الكتاب الكبير و مشيت بيهو البيت دخلت غرفتي ولبست نضارتي وبديت اقرا فيهو ..