قصة سيلا من بلد النصارى 18
بديت اقلب في صفحات الكتاب واقرا ، الكتاب ما عرف محمد النبي ، فعلا كانت عنواينه عبارة عن مواقف و معاملات قام بيها محمد الإنسان ، قريت عن موقفه مع الكفار في يوم فتح مكة لمن قال ليهم ( اذهبوا فأنتم الطلقاء) وكيف انه اصفح عن الكفار الأرادوا قتله ! انه كمان كان بيدعي للهداية ليهم ؟ لنفس الناس العايزين يقتلوهو ؟ كان بيحسن لأسرى الحروب ، وبيعاملهم احسن تعامل ، عرفت انه النبي محمد اساسا كان بحترم اليهود و بيخليهم يقوموا بعبادتهم وشعائرهم وانهم امة واحدة مع المسلمين ، اذن النبي محمد ماكان بميز الأديان ؟ ما كان بنصر المسلمين بس ! كان بيدي اي ديانة حقوقها وبخلي اي زول يقوم بشعائر دينه ! ..
لقيت عنوانه اسمه معاملات النبي مع النصارى و هنا انا يادوب اتحمستا للقراية ، اتشديت اعرف كيف كان بعامل النصارى ، الموقف كان بيحكي عن رجل انصاري جو يسلموا ويتكلموا مع النبي محمد و قالوا ليهو ( أسلمنا قبلك ) فقال ليهم كذبتم ! يمنعكم من الاسلام دعاؤكم لله ولدا وعبادتكم الصليب و اكلكم الخنزير ) .. وقال انهم حرفوا الإنجيل ولم يسلموا لله وحده ! فقالوا ليهو نصارى نجران ، انه ليه شتم صاحبنا وقاصدين عيسى عليه السلام و كيف تقول انه عبد الله ؟
رد عليهم النبي محمد انه عيسى كلمة الله التي القاها في مريم وهو من أولي العزم من الرسل ، فردوا عليهو النصارى انه مافي انسان مخلوق ماعنده أب ! ف لو انت صادق ورينا !
رد عليهم النبي محمد بي اية بتقول ( إِنَّ مَثَلَ عِيسَىٰ عِندَ اللَّـهِ كَمَثَلِ آدَمَ خَلَقَهُ مِن تُرَابٍ ثُمَّ قَالَ لَهُ كُن فَيَكُونُ* الْحَقُّ مِن رَّبِّكَ فَلَا تَكُن مِّنَ الْمُمْتَرِينَ* فَمَنْ حَاجَّكَ فِيهِ مِن بَعْدِ مَا جَاءَكَ مِنَ الْعِلْمِ فَقُلْ تَعَالَوْا نَدْعُ أَبْنَاءَنَا وَأَبْنَاءَكُمْ وَنِسَاءَنَا وَنِسَاءَكُمْ وَأَنفُسَنَا وَأَنفُسَكُمْ ثُمَّ نَبْتَهِلْ فَنَجْعَل لَّعْنَتَ اللَّـهِ عَلَى الْكَاذِبِينَ) ...
كانوا نصارى نجران لسه مصرين على حجتهم ، و النبي لسه بيحاور فيهم ، الغريب انه بعد كدة قبل مصالحتهم على الجزية وماقاتلهم ، لأنه كان بيأسس لقواعد السلام بين المسلمين وبين كل الامم ! ..
لقيت انه اوصى بالجار وبحسن معاملة الجار وتفقد الجار لجاره ، و انه استحمل اذى جيرانه في مكة لمن كانوا بيختوا ليهو الشوك في طريقه وقدام بيته و لمن حاول واحد اسمه عقبة بن ابي معيط إنه يخنقه فدافع عنه صحبه ابو بكر الصديق ..
قريت عن معاملته في البيت و لأهله ، كيف كان بيلاطف الكبير والصغير و يقول كلام لطيف وبيخيط بي نفسه وبيساعدهم في شغل البيت !
كيف كان بيسابق زوجته عائشة ؛ وانه اذا اتقدم ليهو أكل مستحيل يعيبه ، بشكره و بياكله وإلا بخليهو مابياكله .. يعني كان كلامه كله لطيف وما بتطلع منه كلمة جارحة ابدا !!
رغم انه متزوج وعنده كم زوجة لكن كان بنادي اي وحدة فيهم بالإسم المحبب ليها ، بيحرص على ملاطفتهن و تبسمهن، وقال انه اللقمة البتمدها لزوجتك تعتبر أجر و فيها مودة ليها ، و كيف كان بعبر عن حبه وبيوصف لعائشة حبه ليها كالعقد ، كان بقعد مخصوص عشان يستمع للواحدة فيهن ، و بكون مرتاح وهو بسمع فيها وهي بتحكي في قصصها ، كان بفضي نفسه مخصوص عشان يقعد مع وحدة من زوجاته ويستمع ليها ، و كيف انه اوصى بالنساء لأنهم الطف المخلوقات وقال (واسْتَوْصُوا بالنِّساءِ خَيْرًا، فإنَّهُنَّ خُلِقْنَ مِن ضِلَعٍ، وإنَّ أعْوَجَ شيءٍ في الضِّلَعِ أعْلاهُ، فإنْ ذَهَبْتَ تُقِيمُهُ كَسَرْتَهُ، وإنْ تَرَكْتَهُ لَمْ يَزَلْ أعْوَجَ، فاسْتَوْصُوا بالنِّساءِ خَيْرًا) ...
...
عديت ايام وانا بقرا في صفحات الكتاب دة وهو شاديني عشان اعرف شخصية النبي محمد ، بديت اتسائل كيف النبي محمد اهتم بي توضيح كل الأمور دي للمسلمين ، اهتم بالدين والرجال والنساء و كيف كان مسؤول من أسره في ذات الوقت ! و كيف قدر يعدل و يحكم و يسامح الكفار و كل الأديان ! بين حبه لأهل بيته وخدمته ليهم ! بين الرحمه الفي قلبه العامل بيها كل الأطياف واحد !
يادوب حسيت انه محمد عنده حق ، انه النبي محمد ماعنده شبيه ، ما اظن في زول ممكن يتقبل الديانات دي كلها و يسامح ويغفر للبغلط في حقه ، ما اظن في إنسان ممكن يغفر لي زول اهانه كم مرة و يدعي ليهو بالهداية لنفس طريقه ! ..
..
شخصية النبي محمد كان بتمثل الرحمة ، ماعندي وصف ليها غير كدة ، كان انسان رحيم لطيف ودود ، في اية كانت مكتوبة ( وانك لعلى خلق عظيم ) الاية بتوصف النبي محمد ..
ما فاهمة بالضبط الاية معناها شنو ، و كم اية كدة مافهمتها يمكن القرآن فيهو معاني وكلمات حقيقة محتاجة شرح و دة ياهو كلام محمد زاتو ، الحاجة الكان نفسي اعرفها كتاب القرآن بجوة عامل كيف ؟ الآيات دي مكتوبة بي ياتو طريقة ؟ ليه اسمهم سور و اي سورة عندها اسم و ارقام ؟ المسلمين بيستعينوا بي الايات دي في شنو ؟ هل للعبادة بس و لا فيها احكام ؟
الاسئلة بدت تزيد في راسي ، وحسيت اني عايزة اعرف اكتر ، المرة دي عايزة اعرف عن القرآن اكتر من النبي محمد ، لأني شبه عرفت من الكتاب دة معاملاته و اخلاقه مع المسلمين وغير المسلمين ، عايزة اعرف القرآن جوة شكله كيف ؟
قطعت تساؤلي دة امي في لحظة ما اتوقعتها ابدا ، و هي بتضرب الكتاب بي يدها .. سيلا دة شنو؟ تمتمتا من الرهبة الدخلتني لانها ظهرت لي فجاة ! قلت ليها دين محمد ، قالت لي سيلا دة شنو ؟ كتاب اسلامي ؟ قلت ليها دة ما القرآن ، قالت لي كتاب اسلامي برضو صح؟
قلت ليها ايوة ، لكن ما زي ما انتي خاته في راسك ، اسلامي لكن ما شديد ، مسكتني من يدي وقالت لي سيلا بتقري في كتب مامفروض تقربي منها ليه؟
قلت ليها ما قريتو اساسا انا بس كنت بتفرج فيهو ، و هو حق وحدة سورية حارجعه ليها بكرة نستو وانا شلتو عشان ادي ليها ، عاينت لي في عيوني وهي عارفاني بكذب قالت لي سيلا شلتي منها ليه طيب؟
قلت ليها يا ماما نستو , ليه انتي مكبرة القصة قدر دة ، يعني شنو لو كان كتاب مسلم ما هدي عندي اصحاب مسلمين بدخلوا البيت عادي ، شلتا الكتاب وانا زهجانة ودخلتا جوة غرفتي قفلت الباب لكن كنت عارفة انه امي ما عجبها الموضوع اطلاقا ..
وانا فعلا عشان ما تشك وتتعب ساي ، رسلتا للبت قلت ليها الاقيك بكرة جنب الكنيسة الانجيلية عشان تشيلي الكتاب حقك ..
الصباح كنت واقفة و منتظراها ، جات بكل وش مريح و مبتسمة لي سلمت علي وشالته مني وهي بتسالني قريتيهو كلو؟ قلت ليها ايوة يعني شبه كلو ، ابتسمت وسكتت قلت ليها لكن ما اعتقد انه المسلمين بشبهوا نبيهم ، قالت لي كيف؟ قلت ليها ابسط حاجة تعامل المسلمين مع النصارى واليهود الزمن دة مابشبه تعامل نبيكم معاهم في زمنهم داك ، قالت لي لأنه النبي محمد احسن الخلق ، قربتا عليها بغيظ شديد وكأنه القدامي محمد بس ، قلت ليها كلكم بتقولوا كدة انتي ومحمد وكلكم خلاص طالما النبي محمد احسن الخلق وانتو ماقادرين تبقوا زيه متبعينه مالكم ؟ يا اما تبقوا مسلمين زيه يا اما شوفو ليكم ديانه تانية بدل تكونوا اشباه مسلمين ، البت اتهجمت من كلامي معاها وردت فعلي وماكانت عارفه انا قصدي بمحمد منو ؟ ورغم انه تعاملها معاي لطيف لكن انا قابلتها بأقبح وش عندي ودخلت الكنيسة خليتها برة واقفه ..
ضويت شموعي و وقفت ادعي للرب ، وسألته العيب شنو في لحم الخنزير ؟ و لبس الدهب للرجال ؟ ليه نبيهم قال ليهم انتو بتعبدوا الصليب وانتو ما مسلمين ؟
كان قاصد شنو بي الإسلام ، في كم اسلام في الدنيا دي ، ايها الرب أنا لجأت لنورك فأبصرني ببعضه، دعيت و طفيت شموعي و كان لاقيت الراهبة مارجريت سلمت عليها و حمتني بي الصليب و بإسم أمنا مريم ..
طلعت من الكنيسة بعد صليت ، لقيت ماما منتظراني ابتسمت لي و مشيت عليها ، قالت لي كنت عارفاك هنا ، وانا كنت عارفاها عايزة تسأل من الكتاب الاسلامي ، قلت ليها ماما رجعت الكتاب ارتاحي ، قالت لي وهي عاملة انها مامهتمة ياتو كتاب؟
ختيت يدي في ضهرها وقلت ليها ماما انتي عارفة ياتو كتاب ، ماما انتي قلتي الايمان مصدره القلب صح ؟
قالت لي ايوة لو الايمان ما نابع من القلب يبقى هو ما ايمان صحيح ، قلت ليها يعني ما مفروض نكذب في حاجة مؤمنين بي وجودها صح ! قالت لي ايوة صح ..
قلت ليها أنا مؤمنة انه محمد انسان كويس ، قالت لي محمد منو ؟ قلت ليها محمد النبي ، عاينت لي ونططت عيونها ، قلت ليها انا مؤمنة بيهو كإنسان ، قالت لي سيلا انتي مامفروض تكوني مؤمنة بي النبي محمد اساسا لا كإنسان او ك غيره ، و مادايرة نقاش في الموضوع دة تاني ، الرب يحمينا من الفتن و الشك و الردة و جرتني من يدي وقالت لي اذا قعادك مع المسلمين بخليك تقولي كلام فارغ و تبعدي عن دينك ، انا حاقاطعك اذا عرفتا انك بتتكلمي في امور الدين معاهم ، الزمي حدودك عشان هم يلزموا حدودهم معاك ..
كنت عارفة انه امي حتخت اللوم على اصحابي المسلمين بسرعة ..
قربت اجازتي تخلص في ايرلندا و كنت حأرجع السودان ، لسة ماما بتشوف اني صغيرة انه افكاري مامفروض تتلوث واني ممكن ما اعرف الصح من الغلط براي ، لسة بتوصي فيني وتحذرني من المسلمين وهي ما عارفة انه الأسر قلبي مسلم ! المرة دي انا حأفتش اهل ابوي ، عايزة اعرف ليه اهل ابوي رفضوا امي في حين انه نبيهم ما كان برفض المعاملة مع النصارى !
المرة دي انا لازم اشوف اهل ابوي وين و عايشين وين ؟ و بمارسوا الاسلام بي ياتو طريقة ؟ ..
Comments
Post a Comment
اكتب تعليق حول الموضوع