اضطراب فرط الحركة وتشتت الانتباه ADHA

تشتت الانتباه وفرط الحركة مرض بيصسب الاطفال من عمر 6 سنوات لحد 12 سنة في الاغلب وممكن يستمر معاهم لما يكبروا كمان

والحقيقة انه من اكتر الاضطرابات النفسية انتشارا بين الاطفال بيصيب حوالي 8.5 % من الاطفال و 2.5 % من البالغين كمان

بيصيب حوالي 3 اضعاف في الولاد اكتر من البنات

ياتري ايه هي اسبابه وبيجي منين؟؟

الحقيقة ان لحد النهارده مفيش سبب واضح وصريح قدر العلماء يقولوا هو ده السبب الرئيسي بس فيه بعض الادلة اللي بتقول ان

• الجينات ليها دور كبير 

• وكمان الولادة المبكرة 

• اصابات الدماغ في الاطفال

• تدخين الام او شرب الكجوليات اثناء الحمل

• كمان التعرض لضغوط شديدة اثناء الحمل

مش مثبت ابدا ان اكل السكريات كتير او الفرجة علي التليفزيون كتير اثناء الحمل ليه دور في حدوث فرط حركة وتشتت انتباه للطفل بعد كده

طيب ايه هي الاعراض الي اشك عن طريقها ان ابني او بنتي عنده فرط حركة ومحتاجة استشارة طبيب نفسي ؟؟؟

هي عبارة عن مجموعتين من الاعراض 

• الحركة الزيادة اللي بتكون مش مناسبة مع الموقف والاندفاعية ودي معناها انه بيعمل حركات وتصرفات متسرعة من غير مايفكر فيها وغالبا بتكون مؤذية ليه او للي حواليه

عادي جدا ان الاطفال في السن ده انهم يكونوا بيتحركوا كتير وكمان مش بيحسبوا حركاتهم وتصرفاتهم دايما لكن في النوع ده من المرض بنتكلم عن اعراض مستمرة وشديدة وفعلا الولد ممكن يأذي نفسه او اللي حواليه غصب عنه:

1. دايما بيسيب الكرسي ويقوم في المواقف اللي متوقع فيها يفضل قاعد زي حل الواجب والاكل مثلا.

2. لو قعد يفضل يتلوي في الكرسي ويبقي زهقان ومش طايق.

3. مش بيبطل حركة ابدا مبيفصلش.

4. دايما بيجري ويتنطط ويتشعبط في اي حاجة.

5. مبيعرفش يلعب في هدوء من غير دوشة.

6. متسرع بيجاوب قبل السؤال ما يكمل.

7. ميعرفش يستني دوره.

8. بيتكلم كتيير اوي.

9. دايما بيقاطع اللي بيتكلم معاه ويتدخل في الكلام حتي لو مش ليه.

• ونقص التركيزاوالتشتت بمعني اصح مش بيقدر يحافظ علي تركيزه في حاجة 

وبرده عادي ان الطفل في السن ده يفقد تركيزه من وقت للتاني لكن عشان اقول ان ده مرض لازم يكون العرض ده موجود بشكل مستمر وشديد وبيأثر علي تحصيله في المدرسة او بيعمل مشاكل في البيت او مع الاصحابوهنا الطفل بيبقي عنده مجموعة اعراض بصورة واضحة

1. بيواجه صعوبة انه يحافظ علي انتباهه في المطلوب منه 

2. مابيقدرش يهتم بالتفاصيل

3. ميحبش او يتجنب  يعمل المهام اللي بتحتاج مجهود ذهني لمده طويلة

4. بينسي كتير 

5. بيتشتت بسهولة

6. بيضيع حاجته كتير جدا

7. بتحس انه مش سامعك وانت بتكلمه

8. مش بيمشي علي التعليمات المطلوبة منه

9. مش بيعرف ازاي ينظم الانشطة والحاجات المطلوبة منه.

وعلي اساس ظهور الاعراض بنشخص ال ADHD

1. تشتت انتباه اكتر

2. فرط حركة اكتر

3. او نوع تالت بتظهر فيه اعراض من المجموعتين قد بعض  وبنسميه نوع مشترك .

مش اي طفل عنده عرض من الاعراض اللي اتكلمنا عنها نشخصه ADHD 

• عشان نشخص لازم يكون موجود 6 او اكتر من اعراض اي مجموعة  لمده متقلش عن 6 شهور متواصلة

• الاعراض بتظهر في مكانين مختلفين في البيت والمدرسة مثلا او النادي مينفعش تكون في مكان واحد

• الطفل يكون اقل من 12 سنة

• الاعراض تكون مأثرة بالسلب علي حياة الطفل وتواصله اجتماعيا او وظيفيا ( في المدرسة ).

• ميكونش الولد عنده اي مشاكل نفسية تانية مسببة الاعراض دي زي صعوبات التعلم او القلق او الإكتئاب وغيرها.

اتكلمنا النهارده عن الاعراض والاسباب وايه هو ال ADHD  عموما 

لو شاكة ان ابنك او بنتك بتعاني من الاعراض او حاجة منها متجريش تشخصي ابنك بنفسك  استشيري طبيب نفسي هو هيقدر يقيم حالة الطفل لا تسمعي كلام من المدرسة بتاعته 🙃ولا قريبتك اللي ابنها مش بيقوم من مكانه