Conduct Disorder
فيه مرض نفسي معروف بيصيب بعض الأطفال والمراهقين اسمه "اضطراب المسلك "..Conduct Disorder
فى المرض ده.. الطفل بيكون عدوانى بدرجة كبيرة Aggressive يتعصب ويتنرفز على أبوه وأمه واخواته.. ممكن يمد إيده عليهم.. يدخل فى خناقات ومشاكل كتير مع أى حد وكل حد.. ممكن يؤذى حد.. يتنمر على حد.. يغلس ويرخم على حد.. يخوف حد.. حتى الحيوانات ماتسلمش منه..
بيكون كمان طفل مخرب Destructive behavior يعنى يكسر.. يحرق.. يبوظ أى حاجة تطولها إيده..
بيكون برضه مخادع Deceitful.. يعنى يكدب.. يسرق.. يقتحم البيوت والمحال وغيرها..
وكمان بيخترق كل القوانين والقواعد المجتمعية Violating Rules.. يهرب من المدرسة.. يعمل مقالب.. لا يحترم الآخرين على الإطلاق.. ويتعدى على حقوقهم بشكل دائم..
كل الأطفال بيتعصبوا أحياناً.. بيعندوا أحياناً.. بيكسروا ويبوظوا أحياناً.. لكن الطفل ده موضوع تانى..
الطفل ده بيكون مطلع عين أبوه وأمه حرفياً.. عنيد لأقصى درجة.. مش بيسمع أى كلام.. يتحداهم ويتحدى توجيهاتهم.. يقاومهم ويرفض طلباتهم.. 24 ساعة.. 7 أيام فى الأسبوع..
بيكونوا مش عارفين يعملوا معاه إيه.. كل طاقتهم خلصانة معاه.. يحاوطوا عليه من هنا.. يعمل مشكلة من هنا.. يعاقبوه من هنا.. يورطهم هناك..
الناس بتفتكر إن الولد ده مش متربى.. أو متدلع.. أو أهله مهملينه.. أهله نفسهم بيشكوا فى نفسهم، ويحسوا بالتقصير والذنب.. ويروحوا لدكتور ورا دكتور يقولوله نعمل إيه؟ نربيه إزاى؟
الطفل ده مريض.. ومرضه له أسباب.. منها وجود تلف عضوى أو وظيفى بالمخ.. استعداد جينى.. صدمات نفسية عنيفة..
وبعض الأطفال بيكون معاهم -كمان- اضطراب نقص الانتباه وفرط الحركة ADHD، أو اضطراب التحدى المعارض ODD فى نفس الوقت.. وده يزود الأمور صعوبة فوق صعوبتها..
الطفل اللى زى ده محتاج علاج (دوائى أو نفسي أو الاتنين مع بعض).. وتقويم/تعديل سلوكى.. ورعاية وتفهم شديدين..
الأهل كمان بيكونوا محتاجين دعم.. ومساعدة.. وتوعية..
الأبحاث الحديثة وجدت أن نسبة كبيرة من الأطفال المصابين باضطراب السلوك ممكن يتعافوا ويخفوا ويتغيروا كويس جداً بالخطوات التشخيصية والعلاجية السليمة.. والتقويم السلوكى المدروس..
ولو ده ماحصلش.. فالأطفال دول بيتحولوا بخطوات ثابتة إلى شخصيات سيكوباثية شديدة الصعوبة لما يكبروا..
ودى قصة تانى خالص.
Comments
Post a Comment
اكتب تعليق حول الموضوع