شلل النوم أو ما قيل عنه الجاثوم. sleep paralysis
بدايةً لازم تعرف إنه مش( مرض )، لا نفسي ولا عضوي، ولا جن، ولا قرين،
وشائع حدوثه للإنسان منذ فجر التاريخ، ولكن قديمًا كانت تشيع التفسيرات الأسطورية فقالوا جن! وده سبب كتابتي للبوست تصحيح كل الخرافات عن الموضوع .
اول حاجة عشان نفهم الموضوع نعرف مراحل النوم !
وأنت واعي وعلى مشارف الصحيان أو على مشارف النوم، المخ بيكون وقف كل النشاطات الحركية الإرادية للجسم، تمهيدًا لمرحلة الأحلام، عشان لو حضرتك بتحلم أنك بتجري من عصابة في الحلم، متقومش تجري على السرير...
او لو بتحلم انك سبايدر مان متقومش تتنطط وانت نايم
ركز هنا ان المخ موقف جسمك كله عن الحركة
الا عينك لو بصيت ف حلمك فوق هتبص وانت نايم فوق وبتكلم عن حركة العين وهيا مغمضة
يعني حضرتك في الفيصل الزمني البسيط دا بتكون واعي + غير قادر على الحركة الإرادية.
فايق جزئيًا ووعيك مشوش، لكنك غير قادر أنك تتحرك... أو بلغة الميكانيكا: فيه كهربا، بس الموتور مش داير.
وهنا يحضرني معلومة لازم حضرتك تعرفها، وهي أن النوم عبارة عن مرحلتين:
Non REM
دي بتمثل استرخاء تام، عشان تريح الجسم ودي مبتحلمش فيها، وبتمثل 75% من وقت النوم
2. REM
ودي بتمثل جزء صغير جدا من النوم، ودي اللي بتحلم أثنائها، الحلم بيستمر 25% من مجمل النوم، وفي الغالب جدا بتكون قبل الصحيان مباشرة، وفي المرحلة دي انت بتكون فاقد السيطرة تماما عن الحركة
وهكذا النوم ماشي من Non REM لـ REM ومن REM لـ Non REM
نربط الكلام
خلل وظيفي معين بيمنعك من الحركة خلاص حصل الشلل الطبيعي لكنك بتكون ف مرحلة ان خلاص صحيت لكن المخ مبعتش اشارة للجسم انك صحيت فبيكمل عملية الشلل عشان لو حلمت متتفاعلش بجسمك مع الحلم زي ما قولنا فوق .
شلل النوم اللي بيحصل قبل الاستيقاظ، بيحصل أثناء مرحلة الـ REM، يعني أثناء مرحلة الأحلام، أو الانتهاء منها... لذلك كل ما تراه أثناء شلل النوم، هو هلاوس لا وجود لها، فاطمئن... تشوف أشباح، تشوف ناس، تحلم أنك قمت ولكنك لسه راقد، كلها هلاوس.
الشيء الظريف إن الشلل دا بيستمر من ثواني لدقائق، مبيوصلش لأكتر من كدا، انت ممكن تحس إنه مطول معاك، لكنه مجرد دقائق فقط!
استغرقتنا التفاصيل، ونسينا الأسباب، فإيه هي الأسباب؟!
اضطرابات النوم، يعني نقص النوم، أو عدم انتظام جدول النوم.
ضغط نفسي.
عسر المزاج
النوم على ظهر، ودي إحصائيًا يعني...
بعض أدوية اضطراب نقص الانتباه وفرط النشاط ADHD.
هل الأمر يستدعي زيارة طبيب؟!
: لا.. الأمر لا يستدعي زيارة طبيب.
Comments
Post a Comment
اكتب تعليق حول الموضوع